List of products by brand DOMAINE AMAMA

Joanes Haritschelhar

Irulegiko arno ekoizlea

AMAM ETXALDEA

64430 BAIGORRI

Amama etxaldea, ereman proiektua da. 2022-an, Joanesen ama erretretarat joaiterakoan, segida elkarrekin hartzeko erabakia hartu zuten aldaketa batzuk eginez. Laborantxa Biologikorat pasatzeaz gain, produktua bururaino eremaiteko xedez, sotoa moldatu dute garaje batean arnotzeko materiala erosiz. Beren lehen arno botoilak 2023ko udan proposatu dituzte.

Bere amaren segida hartzerakoan, mahastigintza ez zen mundu arrotza Joanesentzat, ikasketak araberan egin eta 7 urtez Irulegiko koperatiban sotozain egona baitzen.

Ordu arte etxaldeko mahatsak Irulegiko koperatibari salduak baziren, beren ekoizpena balorizatzeko hautua egin dute soto bat plantan ezarriz eta beren arnoak zuzenki salduz. Amama izena emanez, Joanesen amari eta ama lurrari omenaldi egin nahi izan diote.

4 lur sailetan banatuak dituzte mahastiak. 2 Irulegin kokatuak dira, 1 Anhauzen, eta azkena Baigorrin landatu berri dutena. Jastaketan, lur sail bakotxaren berezitasunak agertzen dira.
Irulegiko sormarkako mahats motak dira. Beltzarentzat Bordalesa, Axeria eta Axeri haundia. Xuriarentzat berriz Izkiriota lodia eta Izkiriota ttipia.
Segida hartzerakoan, Laborantxa Biologikoaren hautua egin dute. Eritasuneri eta aldaketa klimatikoari buru egiteko, kobrea, eta sufrearen gain etxean eginiko tisana, pixor eta dekokzioak erabiltzen dituzte baita ere prestakuntza biodinamikoak.

Egutegi biodinamikoa eta ilargiaren mugimenduak ere segitzen dituzte mahastietako lanentzat, mozketa, sotoko lanak, boteilatzea, bilketa...
Neguan, mahastia lotan sartzen denean, auzoek ardiak emaiten dituzte eta ongarri berdeak ereiten dituzte (zereal, lekadunak…) lurraren indartzeko eta estrukturatzeko.

Arnotzea, inoxezko dupetan egina da, gehigarririk gabe. Altxagarri indigenoekin arnotzen dute. Beharrez sufre doi bat gehitzen dute. Kalitatearen zaintzeko erregularki jastatzen dute, eta tenperaturak kudeatzen. Heien ikusmoldean arnoa mahastian egiten da, gutien esku hartzearekin sotoan. Jusak bere nortasuna adieraz dezan.

Ekoizlearen produktuak